MyPuneCity – जगभरातील आर्थिक अनिश्चितता, अमेरिकेच्या व्यापार धोरणातील कडकपणा आणि अमेरिकन डॉलरमधील कमजोरीमुळे सुरक्षित गुंतवणुकीचा पर्याय म्हणून सोने पुन्हा एकदा गुंतवणूकदारांचे लक्ष वेधून घेत आहे. मंगळवारी (१६ एप्रिल) आंतरराष्ट्रीय बाजारात सोन्याच्या दराने (Gold Price) पहिल्यांदाच $ ३,३०० चा टप्पा पार केला असून, दिवसभरातील उच्चांकी दर $ ३,३१८ इतका नोंदवण्यात आला.
गेल्या १२ महिन्यांत सोन्याच्या दरात तब्बल ४० टक्क्यांची झपाट्याने वाढ झाली असून, गुंतवणूकदारांनी इतर सुरक्षित समजल्या जाणाऱ्या संपत्तींपेक्षा (जसे की बाँड्स, इक्विटी) सोन्याकडे अधिक झुकणे सुरू केले आहे.
अमेरिका-चीन व्यापार तणाव वाढल्याने गुंतवणूकदार सतर्क
अमेरिकेचे राष्ट्राध्यक्ष डोनाल्ड ट्रम्प यांनी मंगळवारी सर्व महत्त्वाच्या खनिजांच्या आयातीवर संभाव्य शुल्क लावण्यासाठी चौकशी सुरू करण्याचे आदेश दिले आहेत. यामुळे चीनसह महत्त्वाच्या पुरवठादार देशांबरोबरचे संबंध अधिक तणावपूर्ण होण्याची शक्यता आहे. चीनवर आता २४५% पर्यंत शुल्क लागण्याचा धोका निर्माण झाला आहे, ज्यावर चीनने संयम बाळगण्याचे आवाहन केले असले तरी अमेरिकेच्या दबावाविरोधात गप्प राहणार नसल्याचे स्पष्ट केले आहे.
Pimpri-Chinchwad Police : नागरिकच बनणार पोलिसांचे सीसीटीव्ही
या तणावाच्या पार्श्वभूमीवर जागतिक गुंतवणूकदारांनी सुरक्षित गुंतवणूक म्हणून सोन्याची निवड (Gold Price) करत मोठ्या प्रमाणावर खरेदी सुरू केली आहे.
भारतात सोन्याचा दर ९५,०४० रुपये, १ लाख रुपयांच्या उंबरठ्यावर
भारतीय बाजारातही आंतरराष्ट्रीय घडामोडींचा स्पष्ट परिणाम दिसून येत असून, सोन्याचा दर सध्या प्रति १० ग्रॅम ९५,०४० रुपयांवर (Gold Price) पोहोचला आहे. दररोज होणाऱ्या वाढीमुळे सोन्याचा दर लवकरच १ लाख रुपयांचा टप्पा गाठण्याची शक्यता अर्थतज्ज्ञ वर्तवित आहेत.
ऑगमोंट या संस्थेच्या संशोधन प्रमुख डॉ. रेनीशा चैनानी म्हणाल्या, “डॉलरमधील कमजोरी, व्यापारयुद्धाचा धोका आणि जागतिक आर्थिक मंदीची भीती यामुळे सोन्याच्या दरात विक्रमी वाढ झाली आहे. सुरक्षित गुंतवणुकीच्या शोधात गुंतवणूकदार मोठ्या प्रमाणावर सोने खरेदी करत आहेत.”
PCMC Hoardings : होर्डिंग मालकांना आर्थिक दिलासा द्यावा; सरदार रवींद्र सिंह यांची पालिकेकडे विनंती
सेंट्रल बँकांकडून सातत्याने खरेदी, ETF मध्ये वाढती गुंतवणूक
सोन्याचे दर वाढवणाऱ्या अन्य घटकांमध्ये सेंट्रल बँकांकडून सुरू असलेली नियमित खरेदी आणि गोल्ड-बॅक्ड ETF (एक्सचेंज ट्रेडेड फंड्स) मध्ये वाढती गुंतवणूक हे घटकही महत्त्वाचे आहेत. पुढील काही महिन्यांत अमेरिकन फेडरल बँकेकडून व्याजदर कपात होण्याची शक्यता आहे, ज्यामुळे सोन्याच्या दरात (Gold Price) आणखी तेजी राहू शकते.
सध्याच्या जागतिक घडामोडी, डॉलरचा दबाव आणि गुंतवणूकदारांमधील असुरक्षिततेची भावना पाहता, सोन्याचा दर पुढील काळातही वाढत राहण्याची दाट शक्यता आहे. भारतीय गुंतवणूकदारांसाठी हा एक निर्णायक टप्पा ठरू शकतो, कारण सोन्याने आता १ लाख रुपयांच्या दिशेने स्पष्ट वाटचाल सुरू केली आहे.
