मावळ ऑनलाईन – शिक्षण, समाजसेवा आणि आदिवासी कल्याण क्षेत्रात उल्लेखनीय कार्य करणाऱ्या ज्येष्ठ समाजसेवक, लेखक आणि प्रयोगशील शिक्षणतज्ज्ञ गिरीश प्रभुणे (Girish Prabhune) यांचा विशेष सत्कार सोहळा बुधवार, २५ जून २०२५ रोजी श्री गणेश मोफत वाचनालय व ग्रंथालय, शाळा चौक, तळेगाव दाभाडे यांच्या वतीने आयोजित करण्यात आला आहे.
गिरीश प्रभुणे (Girish Prabhune) हे पद्मश्री पुरस्काराने सन्मानित असून त्यांनी आदिवासी शिक्षण आणि समाज परिवर्तनाच्या क्षेत्रात बहुमूल्य योगदान दिले आहे. त्यांच्या अमृत महोत्सवी वर्षानिमित्त आयोजित या सत्कार सोहळ्यात त्यांच्या कार्याचा गौरव केला जाणार आहे. कार्यक्रम संध्याकाळी ६ वाजता कै. क्षमा अरविंद शहा सभागृहात संपन्न होईल.
Maval : पंधरा वर्षांनंतर पुन्हा भरली शाळा; जुन्या आठवणींना उजाळा!
या विशेष कार्यक्रमात भंडारा डोंगर दशमी समितीचे अध्यक्ष बाळासाहेब काशिद, श्री गणेश वाचनालयाचे अध्यक्ष दिनेश गंगाधर कुलकर्णी, चिटणीस प्रीतम भेगडे, ग्रंथपाल विनया अत्रे यांची उपस्थिती राहणार आहे. श्री गणेश वाचनालयाच्या कार्यकारिणी सदस्यांनी कार्यक्रमाच्या यशस्वी आयोजनासाठी तयारी केली आहे.
समाजहिताच्या कार्याचा गौरव
गिरीश प्रभुणे (Girish Prabhune) यांनी आदिवासी, वंचित आणि दुर्बल घटकांसाठी दीर्घकाळ कार्य केले असून ‘लोकविद्या आश्रम’, ‘एकलव्य शिक्षण प्रकल्प’ यांसारख्या उपक्रमांद्वारे सामाजिक परिवर्तन घडवले आहे. त्यांच्या लेखनातून आणि मार्गदर्शनातून अनेक युवकांना नवा विचार मिळाला आहे.
Jejuri: भंडाऱ्याची उधळण करत माऊलींच्या पालखीचं जेजुरीत स्वागत
संवादातून प्रेरणा
कार्यक्रमात गिरीश प्रभुणे (Girish Prabhune) यांच्याशी मुक्त संवादाचे सत्र आयोजित करण्यात आले आहे. या संवादातून नागरिकांना त्यांच्या विचारधारेची आणि कार्यपद्धतीची थेट ओळख होणार असून विशेषतः युवक, शिक्षक, सामाजिक कार्यकर्ते यांना प्रेरणा मिळणार आहे.
कार्यक्रम सर्वांसाठी खुला असून, तळेगाव परिसरातील वाचक, अभ्यासक आणि सामाजिक जाणिव असलेल्या नागरिकांनी मोठ्या संख्येने उपस्थित राहावे, असे आवाहन संयोजकांनी केले आहे.
